ട്രക്കോമയെ പൂർണമായും നീക്കം ചെയ്ത് ഫിജി; രോഗത്തെ തടയുന്ന 26മത് രാജ്യം

ട്രക്കോമ ഇല്ലാതാകുന്ന 26 മത്തെ രാജ്യമായി ഫിജി. ഇക്കാര്യം ലോകാരോഗ്യ സംഘടനയാണ് വ്യക്തമാക്കിയത്. ക്ലമീഡിയ ട്രാക്കോമാറ്റിസ് മൂലമുണ്ടാകുന്ന ഒരു ബാക്ടീരിയൽ നേത്ര അണുബാധയാണ് ട്രാക്കോമ.

ചികിത്സിച്ചില്ലെങ്കിൽ കാഴ്ച്ചവരെ നഷ്ടപ്പെടാൻ സാധ്യതയുള്ള ഈ രോഗം ശുദ്ധ ജലം, വൃത്തി, ശരിയായ ആരോഗ്യ പരിചരണം എന്നിവയില്ലാത്ത സ്ഥലങ്ങളിൽ പെട്ടെന്ന് പടരുന്നു. ഒരുകാലത്ത് ഫിജിയിലെ പ്രധാനമായ പൊതുജനാരോഗ്യ പ്രശ്നമായിരുന്നു ഇത്. അന്ധത വരെ സംഭവിക്കാൻ സാധ്യതയുള്ള പകർച്ചവ്യാധിയായ ഈ രോഗത്തെ പൂർണമായും ഇല്ലാതാക്കാൻ സാധിച്ചത് സുപ്രധാന നേട്ടമായാണ് ഫിജി കാണുന്നത്.

ഈ പകർച്ചവ്യാധിയുമായി ബന്ധപ്പെട്ട് 2012 മുതൽ രാജ്യത്തുടനീളം സർവേകളും, പഠനങ്ങളും, പരിശോധനകളും നടത്തിയിരുന്നു. എന്നാൽ കുട്ടികളിൽ ഇത് സജീവമായി കണ്ടുതുടങ്ങിയതോടെ മുമ്പ് നടത്തിയ സർവേ അടിസ്ഥാനമാക്കി വീണ്ടും ആരോഗ്യ വകുപ്പ് അവബോധ പരിപാടികൾ സംഘടിപ്പിക്കുകയും വേണ്ട നടപടികൾ സ്വീകരിക്കുകയായിരുന്നു.