' സിനിമയ്‌ക്കെതിരെ ഹേറ്റ് ക്യാംപെയ്ന്‍ പ്രചരിപ്പിക്കുന്നവര്‍ പടം കണ്ടിട്ടില്ല, ചിലന്‍ പൈസ വാങ്ങിയും റിവ്യൂ ചെയ്യാറുണ്ട്' ; ഷമ്മി തിലകന്‍

പൃഥ്വിരാജ് സുകുമാരന്‍ നായകനായി തിയേറ്ററുകളില്‍ എത്തിയ പുതിയ ചിത്രം ' വിലായത്ത് ബുദ്ധയ്ക്ക്' എതിരെ സോഷ്യല്‍ മീഡിയയില്‍ നടക്കുന്ന വിദ്വേഷ പ്രചാരണങ്ങള്‍ക്കെതിരെ പ്രതികരിച്ച് നടന്‍ ഷമ്മി തിലകന്‍. സിനിമയ്‌ക്കെതിരെ ഹേറ്റ് ക്യാംപെയ്ന്‍ പ്രചരിപ്പിക്കുന്നവര്‍ പടം കണ്ടിട്ടല്ല അത് പറയുന്നതെന്നും അദ്ദേഹം പറഞ്ഞു. കൊച്ചു കുട്ടികള്‍ക്കുള്‍പ്പെടെ സിനിമ ഇഷ്ടമായെന്നും ഷമ്മി തിലകന്‍ പറഞ്ഞു.

' സിനിമയ്‌ക്കെതിരെ ഹേറ്റ് ക്യാംപെയ്ന്‍ പ്രചരിപ്പിക്കുന്നവര്‍ പടം കണ്ടിട്ടല്ല അത് പറയുന്നത്. പിന്നെ ചിലര്‍ പൈസ വാങ്ങിയും റിവ്യൂ ചെയ്യാറുണ്ട്. അതിനെക്കുറിച്ചൊന്നും ഒന്നും പറയാനില്ല. അവര്‍ക്ക് അത് ജീവിതമാര്‍ഗമായിരിക്കും. കൊച്ചു കുട്ടികള്‍ സിനിമ ഇഷ്ടമായി എന്ന് പറഞ്ഞു എനിക്ക് വീഡിയോകള്‍ അയക്കുന്നുണ്ട്. ആ വീഡിയോ കണ്ടപ്പോള്‍ ഞാന്‍ കരഞ്ഞു പോയി' , ഷമ്മി തിലകന്റെ വാക്കുകള്‍.

സിനിമയെ ലക്ഷ്യമിട്ടുകൊണ്ട് മതപരവും രാഷ്ട്രീയപരവുമായ വിദ്വേഷ പ്രചാരണങ്ങള്‍ നടത്തിയ യൂട്യൂബ് ചാനലിനെതിരെ കഴിഞ്ഞ ദിവസം സൈബര്‍ സെല്ലില്‍ സിനിമയുടെ നിര്‍മ്മാതാവ് സന്ദീപ് സേനന്‍ പരാതി നല്‍കിയിട്ടുമുണ്ട്. ' ഫസ്റ്റ് റിപ്പോര്‍ട്ട് ഓണ്‍ലൈന്‍' എന്ന യൂട്യൂബ് ചാനലിനെതിരെയാണ് പരാതി.

' തൊണ്ടിമുതലും ദൃക്‌സാക്ഷിയും' , ' സത്യം പറഞ്ഞാല്‍ വിശ്വസിക്കുവോ' , സൗദി വെളളക്ക' തുടങ്ങിയ ഹിറ്റ് ചിത്രങ്ങള്‍ക്ക് ശേഷം ഉര്‍വ്വശി തിയേറ്റേഴ്‌സിന്റെ ബാനറില്‍ സന്ദീപ് സേനന്‍ ഒരുക്കിയിരിക്കുന്ന ചിത്രമാണ് ' വിലായത്ത് ബുദ്ധ'. ജയന്‍ നമ്പ്യാര്‍ ആണ് സംവിധാനം. ജി.ആര്‍.ഇന്ദുഗോപനും രാജേഷ് പിന്നാടനും േചര്‍ന്നാണ് തിരക്കഥ ഒരുക്കിയിരിക്കുന്നത്. ഷമ്മി തിലകന്‍, രാജശ്രീ, പ്രിയംവദ, അനു മോഹന്‍, ടി.ജെ.അരുണാചലം തുടങ്ങി നിരവധി താരങ്ങളാണ് ചിത്രത്തിലുളളത്.