സോഷ്യല് ഫോറസ്ട്രി ഡിവിഷന് ജില്ലാ കാര്യാലയത്തിന്റെ പുതിയ കെട്ടിടം മന്ത്രി എ.കെ. ശശീന്ദ്രന് ഉദ്ഘാടനം ചെയ്തു
മലപ്പുറം: ആധുനിക സൗകര്യങ്ങളോടെ മലപ്പുറം സിവില് സ്റ്റേഷന് പരിസരത്ത് ഹരിതം എന്ന പേരില് നിര്മിച്ച സോഷ്യല് ഫോറസ്ട്രി ഡിവിഷന് ജില്ലാ കാര്യാലയത്തിന്റെ പുതിയ കെട്ടിടോദ്ഘാടനം വനം-വന്യജീവി വകുപ്പ് മന്ത്രി എ.കെ. ശശീന്ദ്രന് നിര്വഹിച്ചു. വനം വകുപ്പില് ധാരാളം പരിഷ്കരണ നടപടികള് ചെയ്യാന് സാധിച്ചുവെന്നും മനുഷ്യ-വന്യംജീവി സംഘര്ഷങ്ങളുമായി ബന്ധപ്പെട്ട എല്ലാ പ്രശ്നങ്ങളും പരിഹരിക്കാന് ശ്രമിച്ചെന്നും ശോചനീയാവസ്ഥയിലായിരുന്ന മലപ്പുറം സാമൂഹ്യവനവത്ക്കരണ വിഭാഗത്തിന് പുതിയ കെട്ടിടം സാധ്യമാക്കാന് കഴിഞ്ഞതില് സന്തോഷമുണ്ടെന്നും മന്ത്രി പറഞ്ഞു.
സോഷ്യല് ഫോറസ്ട്രി ഡിവിഷന് ജില്ലാ കാര്യാലയ അങ്കണത്തില് നടന്ന ഉദ്ഘാടന സമ്മേളനത്തില് പി. ഉബൈദുള്ള എം.എല്.എ. അധ്യക്ഷത വഹിച്ചു. ജില്ലാ പഞ്ചായത്ത് പ്രസിഡന്റ് പി.എ. ജബ്ബാര് ഹാജി, നിലമ്പൂര് നോര്ത്ത് ഡി.എഫ്.ഒ. പി. ധനേഷ് കുമാര്, നിലമ്പൂര് സൗത്ത് ഡിവിഷന് ഡി.എഫ്.ഒ. ജി. ധനിക് ലാല്, വാര്ഡ് കൗണ്സിലര് ടി.കെ. സബ്ന മന്സൂര്, വിവിധ രാഷ്ര്ടീയ കക്ഷിപ്രതിനിധികള്, വനം വകുപ്പ് ഉദ്യോഗസ്ഥര്, സ്കൂള്-കൊളജ് വിദ്യാര്ഥികള് സംബന്ധിച്ചു. സോഷ്യല് ഫോറസ്ട്രി നോര്ത്തേണ് റീജിയന് ഫോറസ്റ്റ് കണ്സര്വേറ്റര് ആര്. കീര്ത്തി സ്വാഗതവും മലപ്പുറം സോഷ്യല് ഫോറസ്ട്രി ഡിവിഷന് ഡി.സി.എഫ്. കെ.എ. മുഹമ്മദ് സൈനുല് അബിദീന് നന്ദിയും പറഞ്ഞു. വനം വകുപ്പിന്റെ സര്പ്പ സന്നദ്ധപ്രവര്ത്തകര്ക്കുള്ള കിറ്റ് വിതരണവും മന്ത്രി നിര്വഹിച്ചു. വിദ്യാവനം പദ്ധതിയുടെ ഭാഗമായി പരിപാടിയില് പങ്കെടുക്കാനെത്തിയ വിദ്യാര്ഥികളോട് വനം വകുപ്പുമായി ബന്ധപ്പെട്ട ചോദ്യങ്ങള് മന്ത്രി ചോദിക്കുകയും സമ്മാനമായി വൃക്ഷത്തൈകള് വിതരണം ചെയ്യുകയും ചെയ്തു.
മലപ്പുറം സിവില് സേ്റ്റഷന് കോംപൗണ്ടിലെ ബി 1 ബ്ലോക്കില് മൂന്നു മുറികളിലായി പരിമിതമായ സൗകര്യങ്ങളിലാണ് ഫോറസ്റ്റ് ഡിവിഷന് ഓഫീസും റേഞ്ച് ഓഫീസും പ്രവര്ത്തിച്ചിരുന്നത്. 2020ല് സിവില് സേ്റ്റഷന് കോംപൗണ്ടില് അനുവദിച്ചു കിട്ടിയ 10 സെന്റ് സ്ഥലത്ത് കേരള പോലീസ് ആന്ഡ് ഹൗസിങ് കണ്സ്ട്രക്ഷന് കോര്പ്പറേഷന് ലിമിറ്റഡിന്റെ നേതൃത്വത്തില് 1,48,45,100 രൂപ ചെലവഴിച്ചാണ് കെട്ടിട നിര്മാണം പൂര്ത്തിയാക്കിയത്. മലപ്പുറം സോഷ്യല് ഫോറസ്ട്രി ഡിവിഷന് ഓഫീസ്, മലപ്പുറം സോഷ്യല് ഫോറസ്ട്രി റെയ്ഞ്ച് എന്നിവയാണ് സിവില് സേ്റ്റഷനിലെ പുതിയ കെട്ടിടത്തില് പ്രവര്ത്തിക്കുന്നത്. കോണ്ഫ്രന്സ് ഹാള്, ഡിവിഷന്റെ റെക്കോര്ഡ് റൂം എന്നിവയും ഇവിടെ സജ്ജമാക്കിയിട്ടുണ്ട്.
ഫോറസ്ട്രി ക്ലബ്ബ്, ഹരിത സമിതി ഏകോപനം, സ്കൂള്-കോളജ് വിദ്യാര്ഥികള്ക്കുള്ള വിവിധ പരിശീലനം, സോഷ്യല് ഫോറസ്ട്രി ഡി വിഷന്റെ വിജ്ഞാന നൈപുണ്യ പ്രവര്ത്തനങ്ങള് എന്നിവ ഏകോപിപ്പിക്കാനുതകുന്ന വിധത്തിലുള്ള സൗകര്യങ്ങളോടെയാണ് കെട്ടിടം നിര്മിച്ചിട്ടുള്ളത്. ഉദ്ഘാടനത്തിന് ശേഷം ലോക വന്യജീവി ദിനത്തിന്റെ ഭാഗമായി തെരഞ്ഞെടുത്ത കോളജുകളിലെ മാധ്യമ പ്രവര്ത്തന വിദ്യാര്ഥികള്ക്കായി ഡിജിറ്റല് വോയ്സസ് ഫോര് വൈല്ഡ് സ്പേസ്, കമ്മ്യൂണിക്കേറ്റിങ് കണ്സര്വേഷന് ഇന് എ കണക്ടഡ് വേള്ഡ് എന്ന വിഷയത്തില് ഏകദിന ശില്പശാല നടത്തി. അസിസ്റ്റന്റ് ഫോറസ്റ്റ് കണ്സര്വേറ്റര് എം. ജോഷില്, വൈല്ഡ് ലൈഫ് ഫോട്ടൊഗ്രഫര് വി.എം.സാദിഖലി ക്ലാസ് നയിച്ചു.
LATEST NEWS
TRENDING NOW
-
സ്നേഹത്തള്ളല് യാത്ര
-
തൃശൂരിന് പൂരാവേശം; തത്തകൃതി വോട്ട്മേളം
-
ഉറപ്പുപാലിച്ച് മമ്മൂട്ടി, കൃത്രിമക്കാലില് നടന്ന് സന്ധ്യ; 'ഇനി വീടിന്റെയും സ്ഥലത്തിന്റെയും കാര്യമല്ലേ... അതും നടക്കും...ഉറപ്പ്...' മമ്മൂട്ടി വാക്ക്, ആശ്വാസത്തിന്റെ തെളിച്ചം
