പ്രാചീന ചേരനാടിന്റെ ചരിത്ര ബന്ധങ്ങള്
'കേരളത്തിന്റെ ആദിമ ചരിത്രം പാലക്കാടന് ഭൂമികയിലൂടെ' എന്ന ഗവേഷണ ഗ്രന്ഥം, കേരള ചരിത്രപഠനത്തില് ഒരു പുതിയ വാതായനം തുറക്കുന്ന ഒന്നാണ്.
പാലക്കാട് പ്രദേശത്തിന് കേരളത്തിന്റെ പുരാതന ചരിത്രത്തിലും സംസ്കാരത്തിലും ഉണ്ടായിരുന്ന സുപ്രധാനമായ പങ്കിനെയാണ് ഡോ. വി. സനല്കുമാര് എഴുതിയ പുസ്തകം വെളിച്ചത്ത് കൊണ്ടുവരുന്നത്. ചരിത്ര ഗവേഷകരും പുരാവസ്തു ഗവേഷകരും ഒരുപോലെ ശ്രദ്ധ നല്കിയിട്ടുള്ള ചേരനാടിന്റെയും പ്രാചീന തമിഴകത്തിന്റെയും ചരിത്രപരവും സാംസ്കാരികപരവുമായ കണ്ണികളെക്കുറിച്ചുള്ള പരമ്പരാഗതമായ ധാരണകളെ ഈ ഗ്രന്ഥം വിപുലപ്പെടുത്തുന്നു. പാലക്കാടിന്റെ പ്രാചീനകാലം മുതല് എ.ഡി. 10-ാം നൂറ്റാണ്ടുവരെയുള്ള ചരിത്രം, ഭൂമിശാസ്ത്രപരവും പുരാവസ്തുപരവുമായ തെളിവുകളുടെ പിന്ബലത്തോടെ, ഇവിടെ വിശദീകരിക്കുന്നുണ്ട്.
ഗ്രന്ഥകാരന്റെ ഗവേഷണം പല കാലഘട്ടങ്ങളിലെയും പാത്രങ്ങളെയും പാത്രശകലങ്ങളെയും ഭൂമിശാസ്ത്രപരമായ മാറ്റങ്ങളെയും ആശ്രയിച്ചാണ് മുന്നോട്ട് പോകുന്നത്. പ്രാചീന ചേരനാടിന്റെ തലസ്ഥാനമായിരുന്ന 'നെടുമങ്ങാട്' എന്ന സ്ഥലനാമത്തെ പാലക്കാട്ടുമായി ബന്ധിപ്പിച്ചുകൊണ്ടുള്ള കണ്ടെത്തലുകള് വളരെ കൗതുകകരമാണ്. ഇത് കേവലം പ്രാദേശിക ചരിത്രത്തിന് അതീതമായി, ചേര-ചോള-പാണ്ഡ്യ സാമ്രാജ്യങ്ങളുമായും പാലക്കാടന് താഴ്വരയിലൂടെ കടന്നുപോയ പ്രാചീന വ്യാപാര പാതകളുമായും ഉണ്ടായിരുന്ന ബന്ധത്തെക്കുറിച്ചുള്ള ഒരു പുതിയ കാഴ്ചപ്പാട് നല്കുന്നു. കൂടാതെ, എ.ഡി. എട്ടാം നൂറ്റാണ്ടോടുള്ള ചേരനാടിന്റെ ചരിത്രം, ബ്രിട്ടീഷുകാരുടെ രേഖകള്, സാമൂഹിക-സാംസ്കാരിക മാറ്റങ്ങള് എന്നിവയെക്കുറിച്ചുള്ള പരമ്പരാഗതമായ അറിവുകളിലെ വിടവുകള് നികത്താനും ഈ ഗ്രന്ഥം ശ്രമിക്കുന്നു.
പ്രാചീന ശിലായുഗത്തിന്റെ ശേഷിപ്പുകള്, മരിച്ചവരുടെ ഓര്മ്മയ്ക്കായി സ്ഥാപിച്ച പാഴികള്, കല്ക്കുടകള്, ശവക്കല്ലറകള് തുടങ്ങിയ പ്രാചീന സ്മാരകങ്ങളെക്കുറിച്ചുള്ള വിവരങ്ങള് ഗ്രന്ഥത്തിലുണ്ട്. അതോടൊപ്പം പ്രാചീന പാലക്കാടന് മേഖലയിലെ പ്രധാനപ്പെട്ട വാണിജ്യ കേന്ദ്രങ്ങളെയും തീര്ത്ഥാടന കേന്ദ്രങ്ങളെയും കുറിച്ചുള്ള വിവരങ്ങളും ഉള്പ്പെടുത്തിയിട്ടുണ്ട്. ഈ ഗവേഷണ പ്രബന്ധം പാലക്കാടിനെ ഒരു പ്രധാന ചരിത്ര ഗവേഷണ കേന്ദ്രമായി മാറ്റുന്നു. പാലക്കാടന് ഭൂമിശാസ്ത്രത്തിന്റെ പ്രാധാന്യം, ഭൂമിശാസ്ത്രപരമായ പരിണാമങ്ങള്, പ്രാചീന ശിലായുഗ സംസ്കാരത്തിന്റെ ശേഷിപ്പുകള്, കൂടാതെ പാലക്കാടിന്റെ പടിഞ്ഞാറന് ഭാഗത്തുണ്ടായിരുന്ന കടല് ബന്ധം തുടങ്ങിയ വിഷയങ്ങള് ചരിത്ര വിദ്യാര്ത്ഥികള്ക്കും ഗവേഷകര്ക്കും ഒരുപോലെ പ്രയോജനകരമാകുന്ന ഒന്നാണ്.
കേരളത്തിന്റെ പ്രാചീന ചരിത്രത്തില്, പ്രത്യേകിച്ച് ചേരനാടിന്റെ ഉത്ഭവത്തിലും വളര്ച്ചയിലും പാലക്കാടിനുണ്ടായിരുന്ന സവിശേഷമായ പ്രാധാന്യം സ്ഥാപിക്കാന് ഈ പുസ്തകം ശ്രമിക്കുന്നു. കാലഘട്ടങ്ങളിലെ ചരിത്രത്തെ ഭൂമിശാസ്ത്രപരമായ തെളിവുകളുമായി ബന്ധിപ്പിച്ചുകൊണ്ട് ചരിത്രരചനയുടെ പരമ്പരാഗത രീതികള്ക്ക് ഒരു പുതിയ ദിശാബോധം നല്കുന്നു.
കേരളത്തിന്റെ ആദിമ ചരിത്രം പാലക്കാടന് ഭൂമികയിലൂടെ
-ഡോ. വി. സനല്കുമാര്
പ്രസാധകര്: ജിയോ ഹെരിറ്റേജ് ആര്ക്കിയോളജിക്കല് റിസര്ച്ച് സെന്റര്, നെന്മേനി, കൊല്ലങ്കോട്. ഫോണ്: 9447874283
വില: 850 രൂപ
